خطأ فادح في صراف بنك سوسيتي جنرال تم حله من ادارة المصرف
![](https://www.tripolinewslb.com/wp-content/uploads/2020/05/E844CDD9-EEF4-407B-8120-AF9B1EE1ECE8.jpeg)
نقلا عن محمد بيروتي
شو صار معي مبارح ببنك ال SGBL ؟؟
فتت عالبنك طالب بحقي واسحب عالدولار متل تسعيرة البنك المركزي عال ٣٠٠٠ ليرة ، قلنا رح نمرقها رغم انو الدولار بالسوق السودا ب ٤٢٠٠ ليرة …
المهم فتت عالبنك لاسحب مصاري من ال ATM Machine ، سحبّوني على سعر الصرف بال ١٥١٥ ليرة …
اعترضت فتت عالبنك وحكيت الموظفين والموظفات ما مشي الحال ، وقالولي انو بال ATM التسعيرة عال ١٥١٥ وخلص منعتذر راحوا عليك المصاري وما في حل ، حكيو مع الادارة كمان ما مشي الحال ، قال قدم اعتراض رسمي والادارة بتنظر فيه وبيجي الرد بعد ٣ ايام ، طبعا انا رفضت ، وقلتلن مش تارك البنك لحتى اخد كااااامل حقي ، انا صار بدي مصرياتي كلن ، اتصلوا بالاجهزة الامنية لحتى تلاقي معي حل ما مشي الحال ..
اتصلت بدوري ببعض الاصدقاء و بحراس المدينة واستنجدت فيهم ، طبعا لبوا النداء مشكورين كعادتهم ، وناشدوا الناس والمحبين والمتابعين والثوار ليوقفوا حدي ويساندوني ، وهون فورا بلشت ادارة البنك تعطيني تطمينات من قبل ضباط وغيرهم من المعارف …
وجائني اتصال من قبل ابو محمود اكد لي ان ادارة البنك لن ترضى بما حصل وسيصلك حقك بالكامل ، وفعلا هذا ما حصل اليوم …
نزلت عالبنك وسحبت ال ٢٠٠٠$ على سعر الصرف الرسمي المحدد ب ٣٠٠٠ ليرة ، وقبضت ٦ مليون ليرة …
خليني خبركن شغلة كتير مهمة ، نحنا عنا حقوق عند البنوك وعند الدولة وما تتعلموا ترضخوا الن ابدا ، طالبوا بحقوقكم وما تتركوها ، انا طالبت بحقي وما ضربت ضربة كف ولا هددت ولا كسرت ولا ولعت شي ، وكل ما قلته اني ما بترك محلي وما بطلع من البنك الا ما اقبض كامل حقي وهيدا يلي صار .